ರಣಬಿಸಿಲಿನಾಗೆ ಅಲೆದು ಮೈಲೀ ದೂರ
ತಂದಿವ್ನಿ ಕೊಡದಿ ಹೊಳೆನೀರ/ಜಳಕ
ಮಾಡಿ ಹೋಗೋ ನನ್ನ ದೊರೆಯೆ//
ಸೀಗೆಯ ಕಲಸಿವ್ನಿ ಹರಳೆಣ್ಣೆ ಕಾಯ್ಸಿವ್ನಿ
ಮೈಗೆಲ ಎಣ್ಣೆನೀರ ಎರಿತೀನಿ/ನಿಲ್ಲಯ್ಯ
ಬ್ಯಾಡೆನ್ನ ಬ್ಯಾಡ ಎನ್ನೊಡೆಯ//
ಸುಳಿದು ಹೋದಲ್ಲೆಲ್ಲ ಜನನೋಡಿ ನಗುತಾರೆ
ಹಳಿದು ನನ್ನ ಬಗೆಯಾಗೆ/ಕೇಳ್ತಾರೆ
ಇರಲಿಲ್ವೋ ಗರತಿ ಮನೆಯಾಗೆ? //
ಆತಾತ್ರದಾಗೆ ಓಡೋಗ ಬ್ಯಾಡ
ಮಜ್ಜಾನ ಮಾಡಿ ಹೊರಗೊಗೋ/ನನ್ನಿನಿಯ
ಎಲ್ಲೂ ಹೋಗೋದಿಲ್ಲ ಊರ ದನಜಾತ್ರೆ//
ಜಾತ್ರೆ ಸಿರಿಯಲಿ ನೀನು ಮಡಿಯ ಮರಿಬ್ಯಾಡ
ಈಬೂತಿ ಇರಲಿ ಹಣೆ ತುಂಬ/ಸಖನೆ
ಪರಮೇಶನ ಗುಡಿಯ ಹೋಗುವಾಗ//
No comments:
Post a Comment