ಮದ್ದಾನೆ ಬಂದಿಳಿದು

ಮದ್ದಾನೆ ಬಂದಿಳಿದು ಮನದ ಬಯಲಿನಲಿ

ಗುದ್ದಾಡಿ ಇದ್ದುದೆಲ್ಲವ ತುಳಿದು ತೀರಿಸುತಿದೆ

ಮುದ್ದಾದ ಗೋವಿಂದ ತ್ವರಿತದಲಿ ಬಾರೊ

ಖುದ್ದಾಗಿ ಮತ್ತೇರ್ದ ಮಾತಂಗಕಂಕುಶವನಿಡಿದು

ಎತ್ತರೆತ್ತರ ಬೆಳೆದಿದ್ದ ಪ್ರೀತಿ ಸ್ನೇಹಗಳು

ತತ್ತರಿಸಿ ಉರುಳುತಿವೆ ಆಯತಪ್ಪಿ

ಒತ್ತರಿಸಿ ನಿಂತ ನಮ್ರ ನಂಬುಗೆಯನೆಲ್ಲ

ಎತ್ತಲೋ ದೂರಕ್ಕೆ ಕಿತ್ತೊಗೆಯುತಿದೆ ಸೊಕ್ಕು

ಮದ ಯಾವ ಮಾಯದಲಿ ಹೊಕ್ಕಿತೋ ನಾಕಾಣೆ 

ಕದಮುರಿದು ತಿಳಿಯಾದ ಮನಸಿನೊಳಗೆ

ಇದರೊದೆತ ಅತಿಯಾಯ್ತು ಬಾರಯ್ಯ ತಂದೆ

ಹದಗೊಳಿಸೆನ್ನ ಮನವ ಮೊದಲಿನಂತೆ