ಗೆಳತಿ- ಪ್ರಕೃತಿ

ನಿತ್ಯವೂ ನೋಡಿದ್ದ ನಮ್ಮ
ವಾಯು ವಿಹಾರದ ಜೋಡಿ
ಕೇಳಿದವು ಗಿಡಮರವು
ಏಕಾಂಗಿ ನನ್ನತ್ತ ಮೊಗಮಾಡಿ

ಸೋಕಿದವು ತಂಗಾಳಿ ತೂಗಿದವು ತಂಬೆಲರು
ಕೇಳಿದವು ನನ್ನ ಎಲ್ಲೋ ನಿನ್ನ ಗೆಳತಿ?
ನನಗಿಂತ ಹೆಚ್ಚು ತಮಗೆ ಪರಿಚಿತ
ಅವಳು ಎಂಬಂತೆ ಪ್ರಕೃತಿ

ಜಿಗಿಯಲಿಲ್ಲ ಇಂದು ಅವಳು
ಹೆಮ್ಮರದ ಎಲೆ ಹಸಿರಿಗೆ
ತೂಗಲಿಲ್ಲ ಇಳಿ ಬಿದ್ದ
ಆಲದ ಹೊಸ ಬೀಳಿಗೆ

ಮೆಲ್ಲ ನುಡಿದೆ ನಾ:
ಅವಳಿಹಳು ಎನ್ನ ಕಣ ಕಣದಲ್ಲಿ
ಅವಳದೇ ಈ ಮನಸಿನೆಲ್ಲ ವಲಯ
ನಾ ಕೊಟ್ಟ ಉಡುಗೊರೆಯ ಹೊತ್ತಿಹಳು ಉಡಿಯಲ್ಲಿ
ಜೀವ ನೀಡಿ ಅದಕೆ ಬರುವಳು ಜೊತೆಯಲಿ

ನಾಚಿ ನಾ ನುಡಿದುದ ಕೇಳಿ
ಚಾಚಿ ನೀಡಿತು ಬಳ್ಳಿ
ತನ್ನೊಂದು ನಗುವ ಪುಷ್ಪ
ನೀಡೆಂದವಳಿಗೆ ಈ ಹೂವು ಬಲು ಅಪರೂಪ

No comments:

Post a Comment