ಉರಗದ ಹೆಡೆಯಲಿ ಊರಿದ ಪಾದ
ಮಧ್ಯಮ ಪಾಂಡವಗವನದೆ ವೇದ
ಬಿದಿರಿನ ಕೊಳಲೊಳು ಊದುತ ನಾದ
ನಲಿಯಲು ನೋಡು ಎಂಥ ವಿನೋದ
ತುರಗದ ರಥಕೆ ಅವನಿರೆ ವೇಗ
ನೋಡುವ ಕಣ್ಣಿಗೆ ಎಂಥ ಸುಯೋಗ
ಮುರಳಿಯ ಕೊರಳೊಳು ನುಡಿಸಲು ರಾಗ
ರಾಧೆಯ ಹೃದಯದಿ ಪ್ರೇಮಪರಾಗ
ಬಣ್ಣಿಸಲಸದಳ ವಿಸ್ಮಯ ಲೀಲೆ
ತೋರುವ ಕೃಪೆಗೆ ಎಲ್ಲಿದೆ ಎಲ್ಲೆ
ಎತ್ತಿದ ಗಿರಿಯ ಬೆರಳಿನ ಮೇಲೆ
ನೋಡಿರಿ ಕೊರಳೊಳು ಹೂವಿನ ಮಾಲೆ
ಬದುಕುವ ಪರಿಯ ಲೋಕಕೆ ಸಾರಿ
ಮುಕ್ತಿಯ ಮಾರ್ಗವ ಮನುಜಗೆ ತೋರಿ
ನಿಂತಿಹ ಚೆಲುವಿನ ನಗೆಯನು ಬೀರಿ
ನೋಡಿರಿ ನಮ್ಮಯ ದೇವ ಮುರಾರಿ
No comments:
Post a Comment