ಸಹಧರ್ಮಿಣಿ

ವೇದ್ಯವಾಯಿತು ಇಂದು ದೇವನಿತ್ತ ದೀಕ್ಷಿತಮಂತ್ರ

ನೀನೆನಗೆ ಬಾಳಿನೊಳು ಎನ್ನ ಸಹಧರ್ಮಿಣಿ

ಭಾಗಿಯಾಗಿಹೆ ನೀನೆನ್ನ ಸಕಲ ಕರ್ಮದೊಳು

ಬರಿಯ ಪಾತ್ರವಲ್ಲ ನಿಜದಾಣೆ ನೀ ಬಾಳಬಂಧನದೊಳು

ಪ್ರೀತಿಪ್ರೇಮದಿ ಪೊರೆದೆ ನೀತಿನೇಮವ ಮೆರೆದೆ

ನೀ ಹರಿಸಿದ ಅಮೃತಧಾರೆಯೊಳು ಮಿಂದ ಪರಮಪಾವನ ನಾನು

ಭೋರ್ಗರೆವ ಮಳೆಯಿರಲಿ ಎದೆಬಿರಿವ ಗುಡುಗಿರಲಿ

ಹೌಹಾರದೆ ಬದುಕ ಬದಿಗಿಟ್ಟು ನೆಚ್ಚಿ ನನ್ನೆಡೆ ನಿಂದ ದೇವಿ ನೀನು

ಬಾಳ ಹಣತೆಗೆ ತೈಲವನೆರೆದು ಬೊಗಸೆಯೊಳು ಬೆಳಗಿಸಿದೆ

ಹೃದಯಾಂತರಾಳದಿ ನೀನಿತ್ತ ಸೊಗಸೇನ ಬಣ್ಣಿಸಲಿ

ಪರಿಪೂರ್ಣೆಯೆಂದು ಭಾವಿಸಿದೆ ನೀ ಸಕಲ ಸೌಕರ್ಯವೆನಗಿತ್ತು

ನಿನ್ನ ಪಡೆದ ಪರಿಪೂರ್ಣ ನಾನಹುದು ಬದುಕಿನಲಿ ದೇವನಾಣೆ