ಸೋಜಿಗದ ಜಗ

ಹಸುವೊಳಗಿನ ಹಾಲು
ಹಾಲಿನೊಳಗಣ ಕೆನೆಮೊಸರು
ಮೊಸರೊಳಗಿನ ಬೆಣ್ಣೆ
ಬೆಣ್ಣೆಯೊಳಗಿನ ತುಪ್ಪ
ಒಂದ ಸೀಳಿ ಒಂದು
ಬರುವುದು ಸತ್ಯ

ಬಳ್ಳಿಯೊಳಗಿನ ಹೂವು
ಹೂವಿನೊಳಗಣ ಮಧುವು
ಮಧುವ ಹೀರಿದ ಜೇನು
ಜೇನಗೂಡಿನ ಮೇಣ
ಜಗದ ಹಿರಿಮೆಯು ನಮಗೆ
ಕಾಣುವುದು ನಿತ್ಯ

ಬೀಜದೊಳಗಿನ ಮರವು
ತತ್ತಿಯೊಳಗಿನ ಹಕ್ಕಿ
ಬಾನಿನೊಳಗಣ ಮಳೆಯು
ಅನ್ನ ನೀಡುವ ಇಳೆಯು
ಎಂಥ ಸೋಜಿಗ ಜಗದಿ
ಮಾಯ ಮಂತ್ರದ ತೆರದಿ

ಬಿಡಿಸಲಾಗದ ಗಂಟು
ತೊರೆಯಲಾಗದ ನಂಟು 
ನೋಡಿ ತಿಳಿಯೆಲೋ ಮನುಜ
ಸಹಜವಲ್ಲದ ನಿಜವ

ಕಾಗೆ

ಗಗನದಲಿ ತೇಲುತಿದೆ ಕಾಗೆ
ಕಾರ್ಮೋಡದ ಹಾಗೆ
ಸತ್ತ ಸಮಾಧಿಯ ಮೇಲೆ ಬರದಿರೆ
ಸಿಗಲಿಲ್ಲ ಆತ್ಮಶಾಂತಿ ಎನುವರು
ಪಿಂಡ ಹಿಡಿದು ನಿನ್ನನರಸಿ
ಕಾ ಕಾ, ಎನುವಾಗ,
ನೀ ಪಿತನಾಗ
ಮೈ ಸೋಕಿದರೂ ಸಾಕು,
ಸ್ನಾನ ಮಾಡಬೇಕು
ಕುಟುಕಿದರಂತೂ ಗ್ರಹಗತಿಗೆ
ಶಾಂತಿ ಮಾಡಲೇಬೇಕು
ಗೂಡ ಕಳಚಿ ಬಿದ್ದರೆ ಜನರು ದೂರ ಸರಿವರು
ಸತ್ತು ಮಲಗಿದ ಅದಕೆ ದಿಕ್ಕು ದೆಸೆಯಾರಿಲ್ಲ
ದೇವ ಪಕ್ಷಿ ಇದುವೆ ಪೂಜೆ ಆರತಿ ಇಲ್ಲ
ಎಂತಹ ವಿಷಾದ ವಿಪರ್ಯಾಸ, ವಿನೋದ

ಬಾಡದ ಭಾವನೆ

ಭಾವನೆಗಳ ಬಿಂದಿಗೆಯ ಹಿಡಿದು
ನಿಂತಿರೆ ನಾನು,
ಕುದುರೆಯೇರಿ ಶರವೇಗದಿ ಬಂದ
ಗೆಳೆಯ ನೀನು
ನಿನಗರ್ಪಿಸುವೆ
ಈ ಭಾವನೆಯ ತಿಳಿನೀರ
ಕಲ್ಮಶವಿಲ್ಲ ಇದರೊಳಗೆ,
ಅಮೃತಕ್ಕಿಂತ ಪರಿಶುದ್ಧ
ಸ್ವೀಕರಿಸು ಬಹುದಿನಗಳ ಭಾವನೆಯ
ನಿರಾಕರಿಸದಿರು
ಒಲ್ಲೆಯೆಂದರೆ ಒಡೆವುದೆನ್ನ ಮನ
ತಂದಿರುವೆ ಎನ್ನ ಅಂತರಾಳದಲ್ಲಿ
ಬಾಯ್ತೆರೆದ ಬತ್ತದ ಭಾವನೆಗಳ
ನಿನ್ನೆಡೆಗೆ,
ಹೊಸಕಬೇಡ ಗೆಳೆಯ
ನೀ ಹೊಸಕಿದರೂ
ಬಾಡದ ಭಾವನೆಗಳಿವು
ನೆನಪಿರಲಿ

ಪುಟ್ಟ ಜೋಡಿ

ಪುಟ್ಟ ಗೂಡಿನೊಳು
ಚಿಕ್ಕ ಹಕ್ಕಿಗಳು
ಚೊಕ್ಕ ಹೃದಯದಿ
ಭಾವನೆ ಬೆರೆಸುತ
ಪ್ರೀತಿಯ ಎರೆಯುತ
ನೋವನು ಮರೆಯುತ
ನಲಿವನೆ ಮೆರೆಸುತ
ಗೆಳೆಯರ ನಗಿಸುತ
ಗೆಳೆತನ ನೆನೆಯುತ
ಮುದದಿಂದುಲಿಯುತ, ಸಮರಸವೀಯುತ
ನಲಿಯುವ ಪರಿಯದ, ಕಣ್ಣಲಿ ಕಾಣುತ
ಹಿಗ್ಗಿದ ಮನದೊಳು, ಹರಸುವೆ ನಿಮ್ಮನು
ಬಾಳಿರಿ ಬಾಳನು, ಬದುಕನು ಕಲಿಯುತ
ಬೆಳಗಿರಿ, ಪ್ರೀತಿಯ ಜ್ಯೋತಿಯ ನಲಿಯುತ

ಸವಿ ತಾ…

ನಡೆಯಲ್ಲಿ ಸವಿ ತಾ
ನುಡಿಯಲ್ಲಿ ಸವಿ ತಾ
ನೋಟದಲಿ ಸವಿ ತಾ
ಸ್ನೇಹದಲಿ ಸವಿ ತಾ
ಮಧುರ ನೆನಪುಗಳ ಸವಿಯುತಾ
ನಿನ್ನೆದೆಯಿಂದಿತರರೆದೆಗೆ ಸವಿ ತಾ ಸವಿತಾ
ಸವಿಯಿರಲು ನಿನ್ನೊಡಲೊಳು
ಸವಿಗಡಲಾಗುವುದು ಬಾಳು
ಸವಿಯ ಸವಿದವರೆಲ್ಲರೂ
ತೇಲುವರು ಸವಿಗಡಲೊಳು

ಅರಿಯೆ ನಿನ್ನ

ನಾ ಅರಿಯೆ ನಿನ್ನ ಮನದ ಸಾರ
ಅದು ಅಷ್ಟು ವಿಸ್ತಾರ
ನಿನ್ನ ಮನದೊಳುದುಗಿಹುದು
ಕಹಿಬೇವೋ, ಸಿಹಿಜೇನೋ?
ನನ್ನ ಹಾರೈಕೆಯಂತು ಮನಸಾರ
ನೀ ಹೋದರೂ
ನನ್ನ ಬಾಳಿಂದ ಬಹುದೂರ
ನಾನಂತೂ ಮರೆಯೆ ನಿನ್ನ
ಉಸಿರಿರುವ ತನಕ
ಬದುಕಲೊಬ್ಬಳೇ ಈ ತರದ ಗೆಳತಿ
ಇರಲಿ ಅಮರ
ಇದು ನನ್ನ ಹೃದಯದೊಳು ಹರಿಯುತಿಹ
ಹಾರೈಕೆಗಳ ಸಾಗರ

ಸುನಾಮಿ

ನನ್ನೆದೆಯಲೆದ್ದ ಸುನಾಮಿಯಲೆ
ನೀನು ಬಾಲೆ
ಮೂಲ ಕಂಪನ ನಾನಾದರೂ
ಅರಿಯೆ ನಿನ್ನ ಅಲೆಯ ನೆಲೆ
ಶರವೇಗದಿ ಬಂದೆ ನೀನು
ಕಣ್ತೆರೆಯುವಷ್ಟರಲ್ಲಿ
ಸಿಲುಕಿದ್ದೆ ನಿನ್ನಲೆಯಲ್ಲಿ ನಾನು
ನಾ ಕಟ್ಟಿದ್ದ ಸಾಮ್ರಾಜ್ಯವನೆಲ್ಲ ಕೆಡವಿ
ಕಟ್ಟಿದ್ದೆ ನೀ ಹೊಸ ಸಾಮ್ರಾಜ್ಯ ನನ್ನೆದೆಯಲ್ಲಿ
ನೀ ಸಹನೆಯ ಸುನಾಮಿಯೋ?
ಅಸಹನೆಯ ವಿಕೃತಿಯೋ
ಅರಿಯದಾಗಿದೆ ಎನಗೆ

ಕಣ್ಣ ನೀರು

ಕಣ್ಣಾಲಿಗಳಲರಿಯುತಿಹ ನೀರದು
ಬರಿಯ ನೀರಲ್ಲ
ದುಃಖದ ಮಡುವಿನಲ್ಲಿ
ಚಿಂತೆಯ ಸರಮಾಲೆಯಲಿ
ಮೋಸದ ಬಲೆಯಲಿ
ಸುಳ್ಳಿನ ಸೆರೆಯಲಿ
ದ್ರೋಹದ ನಡುವಲ್ಲಿ
ಸಿಲುಕಿದುದರ ಪ್ರತೀಕ
ನಾನಾಗಿ ಕರೆಯಲಿಲ್ಲ
ನೀನಾಗಿ ಬಂದೆ ನನ್ನ ಬಾಳಿಗೆ
ಏಕೆ?
ನಗುವಿನ ಅಮಲಿನಲ್ಲಿಯಲ್ಲದಿದ್ದರೂ
ಶಾಂತಿಯ ಮಡಿಲಲ್ಲಿ
ಮಲಗಿದ್ದ ಮಗುವಿನಂತಿದ್ದೆ
ನಾನು,
ಬಂದೆ ನೀ ಗದ್ದಲದ ದನಿಯಾಗಿ
ಪ್ರಿಯವಾಯಿತು ಮೊದಲು
ಅರ್ಥವಾಯಿತು ನಿನ್ನ ಮೋಸದ ಒಡಲು
ನೀ ನನ್ನ ತೊರೆದು ಹೋದರೂ
ನಿನ್ನ ಮರೆಯಬಹುದು
ನಿನ್ನ ಮೊಸದಾಟವನಲ್ಲ

ನವಸಂವತ್ಸರ

ಮೂಡುತಿಹ ದಿನಗಳಿವು
ನವ ಸಂವತ್ಸರದತ್ತ
ನೀ ಕಳೆದ ವರುಷವದು ಜಾತ್ರೆಯಲ್ಲ
ಅದುವೆ ಜೀವನ ಯಾತ್ರೆ
ನೆನಪಿರಲಿ ಕೊರಗಿರಲಿ
ಹಾಳುಗೆಡವಿದ ದಿನಗಳತ್ತ
ವಿವೇಕವಿರಲಿ
ಮುಂಬರುವ ವರುಷದತ್ತ
ಪಡೆದುಕೊಳ್ಳ ಹೊರಟಿಹೆ
ಮತ್ತೊಮ್ಮೆ ದಿನಗಳ ಅಕ್ಷಯಪಾತ್ರೆ
ಸದ್ವಿನಿಯೋಗಿಸು ನೀ
ಇದ ಬರೆಯೆ ನವಚರಿತ್ರೆ

ಭಾರತಾಂಬೆಯ ಪಾಡು

ಭಾರತಾಂಬೆಯ ಜರಿಯ ಸೀರೆಯ
ಹರಿದು ಹೊಲೆಯುತಿಹರು ಪಕ್ಕದ
ಇಂಗ್ಲಿಷ್ ಆಂಟಿಗೆ ಮಿಡ್ಡಿ, ಫ್ರಾಕು, ಸ್ಕರ್ಟುಗಳ
ಅವಳ ಮೈಮಾಟಕೆ ಬೆರಗಾಗಿ ಕೈ ಹಿಡಿದು
ಕರೆದು ತರುತಿಹರು ಸಿಂಹಾಸನಕೆ
ಹರಿದ ಸೀರೆಯ ಕಿತ್ತ ಮಕ್ಕಳ ಕಂಡು
ಮರುಗುತಿಹಳು, ಮೈ ಮುಚ್ಚುತಿಹಳು ಅಳುದುಳಿದ
ಚಿಂದಿ ಆಯ್ದು ಭಾರತಾಂಬೆ
ಒಮ್ಮೆ ಏಕ ಸಾಮ್ರಾಜ್ನಿಯಾಗಿ ಆಳಿದ
ವೀರ ಮಕ್ಕಳ ತಾಯಿಗೇಕೆ
ಇಂತಹ ಮರಿಮಕ್ಕಳ, ಮೊಮ್ಮಕ್ಕಳ ಜನನ
ಅಯ್ಯೋ ಭಾರತಾಂಬೆಯ ಕುಡಿಗಳೇ
ಇನ್ನಾದರೂ ಎಚ್ಚೆತ್ತುಕೊಳ್ಳಿ, ರಕ್ಷಿಸಿ ನಿಮ್ಮ ತಾಯಿಯ
ಮಾನ, ಗೌರವಗಳ ನಿಮ್ಮ ಪೂರ್ವಜರಂತೆ