ನಸುಕಿನ ಕನಸು

ಹೊತ್ತುಮೂಡುವ ಮುನ್ನಾ ಜಾವದಲಿ

ಬಿತ್ತೊಂದು ಮುತ್ತಿನಂತಹ ಕನಸು

ಒತ್ತಿ ಮಲಗಿದಂತೆ ಮೆತ್ತನೆ ಮೈಯವಳು

ಚಿತ್ತಾರದ ಹಾಸಿಗೆಯಲಿ ಹೆರಳ ಹರಡಿ

ಮೈಯ್ಯ ತುಂಬ ಬಯಕೆ ಬಳ್ಳಿ ಹಬ್ಬುತಿರಲು

ಕೊರೆವ ನಸುಕಿನ ಚಳಿಯಲೆನ್ನ ಬರಸೆಳೆದು

ಎದೆಗೆ ಎದೆಯೊತ್ತಿ ಮುತ್ತಿನಾ ಮಳೆಗರೆದು

ಮಗ್ಗುಲಲಿ ತಬ್ಬಿದಂತೆ ನನ್ನ ಬಿಗಿದಿಡಿದು

ಎಚ್ಚೆತ್ತು ನೋಡಿದರೆ ಸುತ್ತೆಲ್ಲೂ ಕಾಣಳಲ್ಲ

ಅತ್ತಿತ್ತ ತಡವಿದರೂ ಕೈಯ್ಯೊಳಗೆ ಸಿಗುತಿಲ್ಲ

ಎತ್ತಹೋದಳೋ ಹುಡುಗಿ ಚಿತ್ತವ ಬದಲಿಸಿ

ಹೊತ್ತಲ್ಲದ ಹೊತ್ತಲೆನ್ನ ಮನವ ಕದಲಿಸಿ

ಹೊದ್ದು ಮಲಗಿದೆ ನಾನು ಕಲ್ಲು ಕರಗುವ ವೇಳೆ

ನಡುಗಿಸುವ ಚಳಿಗೆ ಹಲ್ಲು ಕಟಕಟನೆ ಕಡಿದು

ಮೂಡಣದ ಆಗಸದಿ ಹೊಂಗಿರಣ ಹಬ್ಬುತಿರೆ

ಮಬ್ಬಿನಲಿ ಬಿದ್ದ ಕನಸನೇ ಮತ್ತೆ ಮತ್ತೆ ನೆನೆದು