ತಂಗ್ಯವ್ನ ಮದುವೆ

ಬಂಧುಬಳಗವೆಲ್ಲಾ ಒಂದಾಗಿ ನೆರೆದವರೇ

ಚಿಕ್ಕ ತಂಗ್ಯವ್ನ ಮದುವೇಗೆ|| ಬಂದವರೇ

ಚೆಂದಾದ ಹಾಡ ಹಾಡವರೇ

ಅತ್ತಿಗೆನಾದಿನಿ ಬೆಲ್ಲದಾರತಿ ತೆಗೆದು

ಗಲ್ಲವ ಹಿಡಿದು ನಗಿಸ್ಯಾರೆ|| ಮಧುಮಗಳ

ಬೆಲ್ಲಮಾತಲ್ಲಿ ನುಡಿಸ್ಯಾರೆ

ಭಾವಮೈದುನರೆಲ್ಲ ಬಾಳೆಕಂಬವ ತಂದು

ಬಾಗಿಲ ಚಪ್ಪರಕೆ ಕಟ್ಟವರೇ|| ನಗುನಗುತಾ

ಬಯಲ ತುಂಬೆಲ್ಲ ಕುಣಿದಾರೆ

ಹಿಂಡಿಂಡುಗೆಳತಿಯರು ಕಂಡು ಕಾಣೋರೆಲ್ಲ

ಗಂಡನ ಹೆಸರ ಕೇಳವರೆ|| ತಂಗ್ಯವ್ನ

ದುಂಡುಮೊಗದ ನಾಚಿಕೆ ನೋಡವರೇ

ತುಂಡುಹೈಕಳು ಬಂದು ತುಂಬಿದ ಪಂಕ್ತಿಗೆ

ಸಣ್ಣಕ್ಕಿ ಅನ್ನ ಬಡಿಸವರೇ|| ನೆಂಟರು

ತಿಂದುಂಡು ವೀಳ್ಯ ಮೆಲುತವರೇ