ದೀಪದ ಹಬ್ಬ

ಹೊಸತು ಬೆಳಕ ಹೊತ್ತು ತರಲಿ

ದೀಪದೀ ಹಬ್ಬವು

ತೊಡೆದು ತೊಳೆದು ಅಂಧಕಾರ

ತರಲಿ ಹರುಷ ನಿತ್ಯವು

ಹಾಲ ಬೆಳಕನೆಲ್ಲ ಚೆಲ್ಲಿ

ಹೂವ ಕುಂದ ಅರಳಲಿ

ಮನದ ತುಂಬ ಹೂವಿನಂತ

ಚೆಲುವ ನಗುವು ಚಿಮ್ಮಲಿ

ಮನೆಯ ತುಂಬ ನೀತಿಯೆಂಬ

ತೀಕ್ಷ್ಣ ಚಕ್ರ ತಿರುಗಲಿ

ಎದೆಯ ಬಾಗಿಲಲ್ಲಿ ಅದುವೆ

ರಂಗವಲ್ಲಿ ಬಿಡಿಸಲಿ

ಕಯ್ಯಲಿರುವ ಸುರುಬತ್ತಿ

ಉರಿದು ಬೆಳಕ ನೀಡಲಿ

ಮಿನುಗುತಿರುವ ತಾರೆ

ಎಲ್ಲ ಕಂಗಳಲ್ಲಿ ಹೊಳೆಯಲಿ

ಪ್ರೀತಿಯ ಸಂದೇಶ ಹೊತ್ತು

ಸೂರಬಾಣ ಜಿಗಿಯಲಿ

ಎಲ್ಲ ಮನಕೆ ಇದುವೆ

ಒಂದು ಸ್ನೇಹ ಸೇತುವಾಗಲಿ

ದ್ವೇಷವೆಂಬ ಮತಾಪು

ಮನದ ಮೂಲೆಯಲ್ಲೆ ಸಿಡಿಯಲಿ

ಅನ್ಯ ಮನಕೆ ಅದರ ಕಿಡಿಯು

ಎಂದೂ ಸೋಕದಿರಲಿ

ಶಾಂತಿ ಕರುಣೆ ಮಮತೆ

ಬೆರೆತ ಹೊನ್ನ ದೀಪ ಬೆಳಗಲಿ

ಜಾತಿ ಮತವ ಮೀರಿ ಬೆಳಕು

ಎಲ್ಲ ಜಗಕು ಹರಡಲಿ