ದುಗುಡ ನೀಗಲಿ...

ಮನದ ಈ ಮುಗಿಲಿನಲ್ಲಿ

ದುಗುಡದೀ ಮೋಡ ತೇಲಿ

ತೇಲಿ ತೇಲಿ ಮೈಲಿ ದೂರ

ಚೆಲ್ಲದಿಹುದು ಹನಿಯನು

ಹೆಪ್ಪುಗಟ್ಟಿದೆಲ್ಲ ನೋವು

ಅಡಗಿಹುದು ಮುಗಿಲೊಳು

ಎದೆಯ ತುಂಬ ಬರಿಯ ಬೇವು

ಬಾಳಿನೀ ಕಡಲೊಳು

ಮೋಡದೊಡಲ ನೋವ ಭಾವ

ಒಡೆದು ಹೊರಗೆ ಇಳಿಯಲಿ

ತೊಡೆದು ಹೋಗಲೆಲ್ಲ ನೋವು

ನನ್ನ ಕಣ್ಣ ನೀರಲಿ

ಬದುಕುವಾಸೆ ಹೊಸೆದು

ಮತ್ತೆ ಹೊಚ್ಚ ಹೊಸತು ಕನಸನು

ತಿರುಗಿ ನಲಿವು ಬರುವುದೆಂಬ

ಆಶೆಯಲ್ಲಿ ಇರುವೆನು

ಎಂದೊ ಎಲ್ಲೊ ಯಾರೋ ಬಂದು

ಸೇರಲೆನ್ನ ಜೀವವ

ಅರಿತು ನನ್ನ ಬಾಳಿನೆಲ್ಲ 

ಮುಕ್ತವಾದ ಭಾವವ