ಜೇನಿಗಿಲ್ಲ ಮೈಲಿಗೆ

ರುದ್ರ ಭೂಮಿಯ ಸುಮವು

ಪರಿಮಳವ ಸೂಸಿರಲು

ಮುತ್ತಲಾರವೇ ಜೇನ ಹಿಂಡು

ಬಾರಲಾರವೇ ಪತಂಗದ ದಂಡು

ಸುಮದೊಳಿರುವ ಮಕರಂದಕೆ

ಯಾವ ಮೈಲಿಗೆ ಹೇಳು

ಮಧುವ ಹೀರುವ ಇವಕೆ

ಇನ್ನಿಲ್ಲದ ತವಕ ಕೇಳು

ಬಯಸಲಿಲ್ಲ ಸುಮವು ತಾನು

ಸೇರಲೆಂದು ಶಿವನ ಶಿರವ

ಕೊರಗಲಿಲ್ಲ ಹೇರಿ ಕುಳಿತು

ಸತ್ತ ಶವದ ಹೀನ ಮುಡಿಯ

ಹೂವನರಸಿ ಬರುವ ಭ್ರುಂಗಕಿಲ್ಲ

ಎಳ್ಳಿನಷ್ಟು ಮೈಲಿಗೆ

ಮಧುವ ಹೀರಿ ಹಾರುತಿಹುದು

ಮತ್ತೊಂದು ಬೇಲಿಗೆ

ಹೀರಿ ತಂದ ಜೇನನೆಲ್ಲ

ಸುರಿದು ತನ್ನ ಗೂಡಿಗೆ

ಮತ್ತೆ ಹೋಗುತಿಹುದು ಜೇನು

ಹುಡುಕಿ ತರಲು ಕಾಡಿಗೆ

ಜೇನಗೂಡ ಸುಟ್ಟು ಸುಲಿದು

ಕದಿಯುತಿಹನು ಮಾನವ

ತೆಗೆದು ಕೋಟಿ ಕೋಟಿ ಜೇನ

ಪುಟ್ಟ ಪುಟ್ಟ ಪ್ರಾಣವ

ತಂದ ಎಲ್ಲ ಜೇನ ಹನಿಗೆ

ಮಾಡುತಿಹನು ನಿಯಮವ

ಮುಟ್ಟ ಹೋದರಿತರರೆಲ್ಲ

ಮಡಿ ಮೈಲಿಗೆ ಎನ್ನುವ

ಮಡಿಯಿಂದಲಿ ತಂದು ಜೇನ

ಲಿಂಗ-ಮೂರ್ತಿಗಭಿಷೇಕವ ಗೈವರು

ಶವದ ಮುಡಿಯ ಹೂವ ಹನಿಯು

ಬೆರೆತಿರುವುದ ಕಾಣರು