ಶಿಲ್ಪ ಕಡೆದು ದಣಿವಾರಿಸುವ
ನಿದಿರೆಯೇ ಧ್ಯಾನ
ಕಳೆದ ದಿನಗಳ ನೆನೆಯುತ
ತಂಬಾಕು ಜಗಿಯುವುದೇ ಏಕಾಂತ
ಕಟ್ಟಿಗೆ ಕಡಿದು ಬಳಲಿ
ಬಿಟ್ಟುಸಿರೇ ನಿಟ್ಟುಸಿರು
ಅರಿಯದ ಕಂದನ ತಲೆಯ ಮೇಲೆ
ಕಯ್ಯಾಡಿಸುವ ವೃದ್ಧರದೇ ಪ್ರೀತಿ
ವಿಳಾಸ ತೋರೆ ಜೊತೆಗೂಡುವ
ಬಿಚ್ಚುಮನಸಿನದೇ ಸ್ನೇಹ
ಕಾಣದ ದಡಕೆ ಅಂಬಿಗನೊಡಗೂಡಿ
ದೋಣಿ ಏರುವುದೇ ನಂಬುಗೆ
ಬಾಳಿನೀ ಹಾದಿಯೊಳು ಎಲ್ಲ ತುಂಬಿವೆ
ನಿತ್ಯ ಪಯಣದಿ
ನೋಡಬೇಕಿದೆ ಅರಿತು ನಾವು
ತೆರೆದ ಸ್ವಚ್ಛ ಹೃದಯವ
No comments:
Post a Comment